Jólahugleiðing

Í hugum flestra eru jólin tími friðar, gleði og góðra samskipta.   Á jólum eiga allir að vera glaðir og hamingjusamir, við sendum kveðjur, gefum gjafir og heyrum allsstaðar í kringum okkur boðskap um gleði og frið.  Hjá mörgum myndast togstreita milli raunveruleikans og boðskapar jólanna.  Umræðan í dag um atvinnuleysi, húsnæðisvanda og erfiða fjárhagsstöðu margra  myndar innri óróleika, kvíða og almenna vansæld.  Kröfurnar eru margar, getan mjög takmörkuð og erfitt að ræða við aðra um líðanina.  Erfitt er að setja og virða mörk og almennt  stjórnleysi og vonleysi verður ráðandi.  

Jólakvíðinn er þó ekki endilega tilkominn vegna þess að við óttumst óraunhæfar kröfur um að allt eigi að vera fínt og okkur sæmandi á yfirborðinu.  Heldur ekki síður vegna þess að okkur finnst erfitt að horfast í augu við okkur sjálf.  Erfitt að standa með eigin hugmyndum um hvernig við viljum eiga friðsæl jól, hvar og með hverjum.  Innri togstreita veldur oft mesta kvíðanum. 

Jólin gefa okkur tækifæri til að staldra við, skoða stöðu okkar endurmeta og leggja rækt við það sem er okkur kærast.  Vandinn er þó oft allar væntingarnar sem stafa frá óskráðum jólareglum í samfélaginu og fyrirfram ákveðnum hugmyndum okkar um hvað aðrir eru að hugsa og vilja frá okkur.  Nokkur eftirfarandi atriða geta auðveldað okkur leiðina í sátt og gegnum aðventuna.  Gera fjárhagsáætlun fyrir mánuðinn.  Spyrja okkur, hvað líður "mér" vel með?  Hvað er nauðsynlegt að gera og hvað er tilbúin nauðsyn?  Hvað er eðlilegur kostnaður á jólagjöf miðað við mínar tekjur? 

Munum að það að gjalda gjöf með kærleiksríku viðmóti, brosi á förnum vegi, heimsókn eða símhringingu er oft stærra en margur harður pakkinn.   Það sem við gerum er oft sýnilegra og áhrifaríkara en það sem við segjum. 

Gefum kærleika án ótta um að fá höfnun og elskum án skilyrða. 

Percy B. Stefánsson.